De minister had iets oaver genderneutraal spölgoed ezegd. Det jongens ok met meisiesspölgoed mut spöllen en andersömme. De media springt doar dan boam op, mar mo’nn maakt die zich wear eans aans druk ömme, dus hef niemand het d’r mear oaver.
Denne van Knöldert
D’r komt wel wat vroang bie mie op as ik an genderneutraal spölgoed denke.
– is het zo det jochies en meissies zich anders ontwikkelt as ze ander spölgoed kriegt? Of is het zo det wicher spölgoed kiest ömdet ze det leuker vindt vanwege wie ze bent. Zelf kreeg ik vrogger een kear een poppe. Die is in de kachel beland.
– De opmerking “hij spöllen vrogger ok altied al met poppen” wördt wel iens ‘ezegd van een homo. Mar allenig mar van een homo die vrogger met poppen spöllen. In de lijn van een octopus die met het WK alle wedstrijden goed gokken. Honderden andere dieren deden ok vöarspellingen, mar die waren fout en dan höar ie d’r niks mear van.
– As wie de lijn van genderneutraliteit döartrekt, is het dan ok niet better minder vrouwen op de basisschoele lesse te loaten gee’m ömdet jochies en meissies noe völ te vrouwelijk lesse kriegt? Det d’r ok ruumte is vöar een bittie ravotten en det ze niet de hele tied hoeft te knutselen? Zol dewt leiden töt mear vrouwelijke vuilnismannen? Of hef det met andere eigenschappen te maken…
– Is er iets mis met het verschil tussen jochies en meisies? Wie hebt noe ienmoal mannegies en vrouwties. Biologisch ezene is det de redding van de soart. Vrouwen bent bedoeld öm te baren en te voeden. Mannen mut veroveraars-bloed he’mm öm het zoverre te loaten komm’. Biologisch ezene is het mar goed ok, det de meeste mannen vrouwen gewoon wel lekker vindt. Toch? Det mut ze wel van huus uut met krieng dan.
Dus as ie disse moand inkopen goat doene vöar Sinterkloas, koop dan vöaral wat oe kind leuk vindt, zol ik zo zeng.
Het bericht Denne van Knöldert: Genderneutraal spölgoed? Mooi niet! verscheen eerst op Opinie in Salland.
